Thursday, June 29, 2017  |    

वैदेशिक व्यापारमा छ प्रतिशतले कमी

प्रकाशित मिति: 2016/07/01

असार १७ । नेपालको कुल वैदेशिक व्यापार अघिल्लो वर्षको तुलनामा ५.७ प्रतिशतले ह्रास आई ७४१.७७ अर्ब रुपैयाँ रहन गएको छ ।
 
व्यापार तथा निकासी प्रवद्र्धन केन्द्रको प्रारम्भिक तथ्याङ्कअनुसार आव २०७२÷७३ को ११ महिनाको कुल व्यापारमा निकासी तथा पैठारीको योगदान क्रमशः ८.२ प्रतिशत र ९१.८ प्रतिशत रहेको छ । समीक्षा अवधिमा नेपालको कुल निकासी २३.१ प्रतिशतले ह्रास आई ६०.८२ अर्ब तथा कुल पैठारीमा ३.८ प्रतिशतले ह्रास आई ६८०.९५ अर्ब रुपैयाँमा सीमित हुन पुगेको छ ।
 
उक्त अवधिमा नेपालबाट निकासी भएका प्रमुख वस्तुहरुमा ऊनी गलैँचा, तयारी पोसाक, मुसुरोको दाल, पोलिस्टर तथा अन्य धागो, टेक्सटाइल, फलाम तथा स्टिल र तिनका उत्पादन, हस्तकलाका सामान, चाउचाउ, टुथपेस्ट, अलैँची, चिया, अदुवा, नेपाली हातेकागज, छाला, पस्मिना सल, जडीबुटीलगायत प्रमुख रहेका छन् ।
 
नेपालको निकासी व्यापारमा भारत, संयुक्त राज्य अमेरिका, जर्मनी, बेलायत, टर्की, चीन, जापान, फ्रान्स, इटाली, क्यानडा, बङ्गलादेश, अस्ट्रेलिया, नेदरल्यान्ड्स र भियतनाम रहेका छन् । त्यस्तै पैठारी व्यापारमा भारत, चीन, युएई, इन्डोनेसिया, स्विट्जरल्यान्ड, थाइल्यान्ड, संयुक्त राज्य अमेरिका, अर्जेन्टिना, क्यानडा, फ्रान्स, मलेसिया, जापान, साउदी अरेबिया र भियतनामलगायत प्रमुख रुपमा रहेका छन् ।
 
नेपालको व्यापारिक साझेदारहरुमध्येको प्रमुख साझेदार भारततर्फको निर्यात तथा आयातमा क्रमशः ३३।७ प्रतिशत र ६.२ प्रतिशतले ह्रास आएको देखिन्छ । परिणामतः आव २०७२÷७३ को ११ महिनाको अवधिमा अघिल्लो वर्षको सोही अवधिको तुलनामा १.३ प्रतिशतले ह्रास आई नेपालको कुल व्यापार घाटा ६२०.१३ अर्ब रुपैयाँमा सीमित हुन गएको छ । रासस

तपाईंको बिचार