Thursday, November 23, 2017

एनएमएको नेतृत्व लिन आतुर छु : लामा

प्रकाशित मिति: 2017/07/24
सन्तबीर लामा, प्रथम उपाध्यक्ष –एनएमए
सन्तबीर लामा, प्रथम उपाध्यक्ष –एनएमए

नेपाल पर्वतारोहण संघ (एनएमए)को इतिहासमा तीन कार्यकाल बिताएका वर्तमान अध्यक्ष आङछिरिङ शेर्पाले आफुले जतिसक्दो चाँडो नेतृत्व हस्तान्तरण गर्न चाहेको बताएका छन् । त्यसो त आउँदो अगष्ट ५ मा एनएमए निर्वाचन गर्ने औपचारिक घोषणासमेत भइसकेको छ । एनएमए निर्वाचन मिति नजिकिएसँगै अध्यक्षका आकांक्षीहरु मैदानमा उत्रिएका छन् । त्यसमध्ये अध्यक्षका लागि वर्तमान प्रथम उपाध्यक्ष सन्तवीर लामाको नाम पर्यटन बजारमा चर्चामा छ । उनै लामासँग गन्तव्य नेपालले गरेको कुराकानीको सम्पादित अंशः 

एनएमए नेतृत्वमा यहाँको उम्मेदवारी केका लागि ?
एनएमए पर्वतीय पर्यटन क्षेत्रमा क्रियाशील संस्था हो । म आफै पनि पर्वतीय पर्यटनमा रुचि राख्दै त्यही हावापानीमा अगाडि बढ्दै यहाँसम्म आइपुगे । एनएमएमै पनि एक दशकभन्दा बढी समय बिताइसकेको छु । त्यसैले एनएमएको कार्यक्षेत्र के हो, नेपालका पर्वतीय श्रृंखलाहरुको बारेमा थोरबहुत बुझेकै छु भन्ने लाग्छ । हिजोका दिनमा संस्थामा रहँदा कतिपय कुराहरु हुन आवश्यक भएर पनि लागू गर्न सकिएन । व्यवसायी र मजदुर आरोहीहरुका समस्या पनि छन्, यसलाई व्यवस्थित गर्नका लागि नेतृत्वमा म पुगेँ भने भूमिका निर्वाह गर्ने प्रतिबद्धतासहित उम्मेदवारी घोषणा गरेको हुँ । यसमा अग्रजहरुको माया पनि छँदै छ ।

एनएमए विकासका लागि यहाँको एजेण्डा के के छन् ?
पर्वतीय पर्यटन क्षेत्र सुधारमा एनएमएले खेलेको भूमिका अत्यन्तै अतुलनीय छ । तर समयानुकूल आफ्नो योजना तथा कार्यक्रम परिस्कृत र परिमार्जित नभएको सत्य हो । पर्वतीय पर्यटन र विभिन्न संस्कृति प्रवद्र्धनका लागि व्यवस्थापन मेरो प्रमुख एजेण्डा हुन् । तराईदेखि हिमालसम्म र राष्ट्रिय अन्तर्राष्ट्रिय क्षेत्रसम्म एनएमए र नेपालको पर्वतीय पर्यटनका साथै संस्कृतिको प्रवद्र्धन गर्न सके पर्यटन क्षेत्रको जग बलियो बन्छ । यसलाई पूरा गर्नका निम्ति गुटगत संस्कृतिको प्रभाव थोरबहुत रुपमा एनएमएमा पनि प्रवेश भइसकेको छ, यसको अन्त्य हुनुपर्छ । व्यवसायीका हकहितका मुद्दा नै मेरो प्राथमिकता हो । तीव्र विकास अवधारणा, व्यवसायी, आरोही, मजदुर शेर्पाको जीवन सुरक्षाको अनुभूति दिलाउँदै समुन्नत पर्वतीय पर्यटन आगामी पुस्तालाई हस्तान्तरण गर्ने गरी लागिपर्ने छु । 

नेतृत्व हात पार्नको लागि विभिन्न गुट उपगुटका कुरा पनि आउँछन्, यसमा एलायन्स पनि जोडिएर आउँछ, तपाईको बुझाइ र तयारी के छ ?
यस विषयमा म बोल्न चाहन्नँ । पर्यटन क्षेत्रमै रहेर काम गर्ने भएकाले अग्रज पर्यटन व्यवसायीहरुसँग सहकार्य गर्न जरुरी छ । म पनि सहकार्य गरेरै अगाडि बढ्छु । तर अहिलेसम्मको अवस्थामा कुनै गुटउपगुटमा विभक्त भएको छैन । 

नेतृत्वमा पुग्न वर्तमान अध्यक्ष हुनुको नाताले आङछिरिङ शेर्पाको आशीर्वाद पनि चाहिएला नि ?
 उहाँको आशीर्वाद छ । एलाइन्सकै आधारमा पनि भोलिका दिनमा उहाँले सहयोग गर्न तयार छु भन्नुभएको छ ।

भनेपछि, आशीर्वाद लिन उहाँका पुगिसक्नुभयो ?
हो, गएँ ।  मेरो कर्तव्य हो । म एनएमएमा प्रथम उपाध्यक्ष पनि हुँ । यस अर्थमा मेरो भूमिकालाई उहाँले बुझ्नु भएको छ । 

एनएमएलाई उहाँले सपार्नुभयो कि बिर्गानुभयो ?
छर्लङ्ग छ, राम्रो गरेकै कारण तीन कार्यकाल खानुभयो । उहाँको नेतृत्व क्षमता र टिम स्पीड राम्रो छ, संघमा सक्षम नेतृत्व हो उहाँ ।

सन्तवीर लामाचाहिँ कस्तो व्यक्ति हो ?
काभ्रेको सामान्य कृषक परिवारमा मेरो जन्म भयो । सानैदेखि हिमालको चिसो हावा र सिरेटोका साथै राप र ताप भोग्दै यहाँसम्म आइपुगेको हुँ । सन् १९७३ मा पर्वतीय पर्यटनमा पाइला राखेयता आजसम्म पनि यो यात्रा जारी छ । यात्रा संघर्षका सबैखाले अनुभव संगाल्दै यहाँसम्म आइपुग्दा बीचमा महत्वकांक्षा नभएका पनि होइनन्, तर त्यसलाई व्यवस्थापन गर्दै निरन्तर रुपमा पर्यटनमै समर्पित छु । जीवनको ऊर्जाशील समय रित्तिसकेपछि छोडेर पलायन हुन आत्माले पनि नदीने रहेछ । यस क्षेत्रमा आएर पश्चाताप पनि छैन, थोरबहुत साथीभाइ कमाएकै छु जस्तो लाग्छ । हिजोका दिनमा मजदुर भरियादेखि आज स्थापित व्यवसायीसम्म आइपुग्दा विभिन्न संघसंस्थामा रहेर आफ्ना भोगाइलाई सामान्यीकरण गर्दै आउने पिँढीको लागि समुन्नत पर्यटन क्षेत्र हस्तान्तरण गर्न लागिपरेको छु । 

तपाईंको जित्ने आधार के छ ?
एनएमए हिमाल आरोहणसँग सम्बन्धित संस्था हो भनेर सबैले स्वीकार्ने अर्थमा म आफै हिजोका दिनमा हिमालको चिसो सिरेटो खाँदै र यसैमा गर्व गर्दै बाल्यकाल बिताएँ । समयक्रमले आरोहीहरुको भरिया भएर धेरै समय बिताएको छु, कष्टकर यात्रा, जीवनमरणको त्रास, भोक र पीडाबीच यसमा जोडिएका बालबच्चा परिवार र भविष्यको चिन्तालाई मजदुर साथीहरुले कसरी भोग्न बाध्य छन् ? यो कुरा किताबमा रटेर मैले थाहा पाइराख्नु पर्दैन । हिजोका दिनमा म आफै यसको साक्षी हुँ । जुन धरातलबाट म आएँ, मैले विगत बिर्सेको छैन भने यसबीचमा मप्रति सद्भाव राख्ने धेरै साथीहरु त्यहाँ हुनुहुन्छ, उहाँहरुको शुभेच्छा मलाई छ । एनएमएले सोचेजति गर्न सकेन होला । तर थोरबहुत प्रयास भएकै छन् । वर्तमानमा म आफै प्रथम उपाध्यक्ष हुँदा यसको कार्यशैलीबारे अवगत छुु ।

केही कुरा अपूरा अवश्य छन्, त्यसलाई म नेतृत्वमा पुगें भने गर्न सक्छु भन्ने दृढ आत्मविश्वाससहित आगामी पुस्तालाई गर्व गर्न लायक एनएमए हस्तान्तरण गर्न नै मेरो नेतृत्वमा दाबेदारी हो । हिजोदेखि आजसम्म सन्तवीरले पर्यटन क्षेत्रमा रहँदै गर्दा कसैको कुभलो चिताइएन । सधै व्यवसायी र मजदुर साथीहरुको पक्षमा आवाज उठाइरह्यो । यही नै मेरो जितको आधार हो ।

तपाईंको बिचार