Thursday, November 23, 2017

एनएमए निर्वाचनमा हामी प्यानल होइन पात्र छान्छौ : संगम शेर्पा

प्रकाशित मिति: 2017/08/02
शेर्पा व्यवसायी संघ नेपाल, महासचिव
शेर्पा व्यवसायी संघ नेपाल, महासचिव

संगम शेर्पा शेर्पा व्यवसायी संघ नेपालका महासचिव हुनुहुन्छ ।नेपाल पर्वतारोहण संघ (एनएमए) को आसन्न निर्वाचन नजिकिएसँगै निर्वाचन माहोलले पर्यटन बजार तातेको छ । उसो त शेर्पा समुदायकै बाहुल्यता रहेको भनिएको एनएमएमा शेर्पा व्यवसायीहरु कस्तो नेतृत्व चाहन्छन् भन्ने विषयमा गन्तव्य नेपालले गरेको संक्षिप्त कुराकानी :

नेपाल पर्वतारोहण संघमा भएको निर्वाचन प्रक्रियालाई तपाईहरुले कुन रुपमा लिनु भएको छ ? 
नेपाल पर्वतारोहण संघमा सहमतिय नेतृत्व चयनका लागि हामीले पनि पटक– पटक प्रयास गरेका हौ । त्यो सम्भव भएन । तर पनि हामीले एनएमएलाई बुझेको,  नेपालको पर्वतीय पर्यटनको विकासमा राम्रो अनुभव भएको साथीहरुलाई एनएमएमा पठाउनुपर्छ भनेर आग्रह गरेका थियौ ।  अहिले दुइ पक्ष जुन रुपमा प्यानल सहित निर्वाचनमा होमिनु भएको छ । बढीभन्दा बढी आरोहीहरुलाई समेटेर टिम निर्माण गर्न हामीले दुबै समूहलाइ भनेका थियौ । तर कति समेट्नु भएको छ छैन भन्ने कुरा त प्यानल सार्वजनीक भएसँगै स्पष्ट देखिएको छ । अव हेर्दै जाउ । 

अहिलेको दुई प्यानल मध्ये तपाईहरुको संस्थाको समर्थन चाही कसलाई ?
सहमतिय नेतृत्व चयन हुन नसकेपछि हामीले अहिलेको निर्वाचन प्रक्रियालाई स्विकार गरेका छौ । सोही अनुसार अव कसलाई समर्थन गर्ने र कसलाई नगर्ने, कसको एजेन्डा के छ भनेर हामीले गम्भिर छलफल गर्यौ र गरिहेका पनि छौ । राजनीतिक लेनदेनका आधारमा टिम निर्माण गर्दा दक्ष, अदक्ष सबै पर्ने हुदाँ हामी प्यानल नै भन्दा पनि पात्र छान्ने योजनामा छौ । जसले सम्बन्धित क्षेत्रमा दक्षता हाँसिल गरेको छ, सानो तिनो प्रलोभनमा परेर संस्था र पर्यटन क्षेत्रको अहित हुने काम कहिल्यै नगर्ने त्यस्तो व्यक्तिलाई हामी मत दिएर विजयी गराउछौ । 

एनएमएमा आवद्ध तपाई व्यवसायीहरु नयाँ नेतृत्वबाट के चाहनु हुन्छ ? 
हामीले एनएएममा विगत देखिका कामहरु हेरेका छौ । अहिलेका उम्मेदवाहरुको एजेन्डा पनि गम्भिर रुपमा अध्ययन गरिरहेका छौ । उम्मेदवारहरुले पिक जोगाउने कुरा पनि गर्नुभएको छ । भएका पिकलाई जोगाएर मात्र अब पुग्दैन । नयाँ नयाँ पिक खोज्ने विषयमा पनि स्पष्ट भिजन चाहियो । आज ५० हजार पर्यटक खुम्बुक्षेत्र छिर्दा पर्यटकले भिडभाड भएको महसुस गर्न थालिसकेका छन् । त्यस्तो महसुस हुन नदिन नयाँ नयाँ पिकहरु खोजेर त्यसको प्रचार–प्रसार गर्न जरुरी छ । अर्को पर्वतारोहण पर्यटनका लागि आवश्यक लाखौ दक्ष जनशक्ति उत्पानद गर्नुपर्ने आवश्यकता छ । भएका जनशक्ति ग्रिनकार्ड र अन्य लोभमा बिदेशीएका छन् ।  फलस्वरुप कम्पनीहरुले पर्वतारोहण सम्बन्धि सामान्य ज्ञान समेत नभएकाहरुलाई यस क्षेत्रमा संलग्न गराएका छन् जसको कारण हिमालमा दुर्घटनाको रेस्क्यू बढ्दो  छ । यि विषयमा पनि उम्मेदवारहरुले विशेष ध्यान दिन जरुरी  छ । 

अन्तमा एनएमए पछिल्लो समय उद्धेश्य बिहिन हुँदै गयो भन्ने गरिन्छ के त्यो सही हो ? 
बास्तवमा एनएमएले स्थापना कालमा के के गर्ने लक्ष्य र उद्धेश्य राखेको थियो र अहिले के गर्दै छ सबैलाई थाहा नै छ । त्यहाँ गएर कसले कति के राम्रो काम गरे कति नराम्रो काम गरेपनि थाहा भएकै कुरा हो । एआइआई लगायतका अन्तर्राष्ट्रिय संस्थाको त कुरा छाडौं नेपालकै पर्यटन मन्त्रालय र टानसँग सहकार्य गरेर काम गर्न सके जस्तो देखिदैन । पूर्वाधारको हिसावले पनि एनएमए राम्रो अवस्थामा छ । तर समन्वयको अभावमा जे जस्तो काम हुनुपर्ने हो त्यो हुनसकेको छैन । 

तपाईंको बिचार