Sunday, April 21, 2019

कसैलाई त्रसित बनाउने होइन, पर्यटनमा गलत गर्नेलाई छाड्दैनौ : धनश्याम उपाध्याय

प्रकाशित मिति: 2018/07/04
धनश्याम उपाध्याय, सहसचिव –संस्कृति, पर्यटन तथा नागरिक उड्डयन मन्त्रालयका
धनश्याम उपाध्याय, सहसचिव –संस्कृति, पर्यटन तथा नागरिक उड्डयन मन्त्रालयका

नेपाल सरकारले पदयात्रामा गएका पर्यटकहरुलाई विरामी बनाएर हेलिकोप्टर उद्धारको नाउँमा मोटो रकम असुल्ने कम्पनीहरुमाथि छानविन थालेको छ । संस्कृति, पर्यटन तथा नागरिक उड्डयन मन्त्रालयका सहसचिव धनश्याम उपाध्यायको नेतृत्वमा छानविन समिति गठन गरी काम अघि बढाइएको हो ।  दर्जनौ हस्पिटल, टेकिङ र हेलिकोप्टर कम्पनीमाथि यस्तो फर्जी काम गर्ने गरेको उजुरी परेको छ । जसले गर्दा सिंगो पर्यटन क्षेत्रमा एक प्रकारको आतंक मच्चिएको छ । अहिले यसबारे राष्ट्रिय तथा अन्तर्राष्ट्रिय रुपमा प्रचारबाजी भइरहेको छ । तसर्थः छानविन समितिले अहिलेसम्म के कसरी छानविन गरिरहेको छ भन्ने विषयमा छानविन समितिका संयोजक धनश्याम उपाध्यायसँग गरिएको ताजा कुराकानीः 

छानविन समितिको समयसिमा सकिएपनि अहिलेसम्म त्यसको खास उपलब्धि देखिदैन । अहिलेसम्म छाविनको काम कहाँ पुग्यो ?

छानविनको काम अहिले चलिरहेको छ । हामीलाई गत १५ गतेसम्मको समयावधि दिइएको थियो । तर हामी आवश्यक सूचना संकलनकै क्रममा रहेको हुँदा थप केही समय लाग्नेभयो । र, केही दिनका लागि म्याथ थपिदै छ । कति समय थप गर्ने भन्नेमा निर्णय भइसकेको छैन । तीन वर्षको तथ्यांक हेर्ने भन्ने हाम्रो निर्णय भएको छ । त्यसका लागि समय लाग्ने देखिएको छ । हामीले आवश्यक सूचना सबैसँग माग गरिरहेका छौं । सोहीअनुसार आवश्यक प्रक्रिया समितिले अघि बढाइरहेको छ । यसबारे छिट्टै सत्य, तथ्य हामी बाहिर ल्याउछौं । 

 तपाईहरुको प्रारम्भिक अध्ययनले के देखाउछ ?

दर्जनौं कम्पनीविरुद्ध उजुरीहरु परेका छन् । अनौपचारिक सुचनाहरु आएका छन् । सत्य, तथ्य पत्ता लगाउन त्यसले सहयोग त गर्छन्, तर वास्तविकता बुझ्न त्यसलाई मात्र आधार मानेर हुदैन । हामीले थप आवश्यक सूचना मगाएर अध्ययन गरिरहेका छौं । त्यसकारण अहिले यसो भयो र उसो भयो भन्ने अवस्थामा हामी पुगेका छैनौं । 

यस विषयले सिंगो पर्यटन क्षेत्रमा आतंक मच्चिएको छ र यस विषयसँग जोडेर पर्यटनको भविष्यबारे विभिन्न तर्क वितर्क हुन थालेको छ नि ? 

गलत गर्नेले गलत गरिरहेको छ भन्दा कुनै नकारात्मक सन्देश जादैन । नकारात्मक सन्देश जानबाट रोक्नलाई चाही छानविनले मद्दत गर्छ । छानविन गरिरहेको अहिलेको अवस्थामा हामीले गलत सूचना प्रेशित गरिरहेका छैनांै । र, यही मिडियामार्फत के भन्न चाहन्छु भने गलत गर्नेले गलत गर्यो भन्दा केही नकारात्मक सन्देश जादैन । बरु विश्वभर सकारात्मक सन्देश चाँही जान्छ । र, यस्ता गलत धन्दा गर्ने खराब प्रवृत्तिका व्यवसायीहरु पनि कारबाहीको दायरामा आउँछन् । यस्ता सूचना त अरु देशका पनि आउँछन् । गलत काम गर्नेलाई गलत गरिरहन देउ होइन भने नकारात्मक सन्देश जान्छ भन्ने पनि हुन्छ ? गलत प्रवृतिलाई त रोक्नु प¥यो नि ? त्यसकारण सबै ढुक्क हुनुस् पर्यटनमा गलत गर्ने केही व्यवसायी कारबाहीको दायरामा आउदैमा नेपालको पर्यटनमा कुनै गलत पर्दैन । बरु विश्वभर सकारात्मक सन्देश प्रवाह हुन्छ । 

छानविनलाई प्रभावित पार्न राजनीतिक दबाव र प्रभाव कत्तिको आइरहेको छ ?
 त्यस्तो कुनै राजनीतिक र प्रशासनिक प्रभाव छैन । हामी निर्धक्कसँग छाविन गरिहेका छौं । सूचनाहरु माग गरी अध्ययन गरिरहेका छौं । केही समय लाग्ने देखिएको छ । यो कार्यमा सरकार, राजनीतिक दल सबैको अग्रसरता छ । बरु सत्य, तथ्य छिटो बाहिर ल्याउनका लागि चाही दबाव आइरहेको छ । 

पर्यटन व्यवसायी र पर्यटकीय संघसंस्थाबाट यो कार्यमा कतिको सहयोग पाइरहनु भएको छ ?
  उहाँहरुबाट पनि हामीले कुनै असहयोगको महसुश गरेका छैनौं । सबैबाट पूरापुर सहयोग छ । 
 
अन्तमा केही भन्नु छ ? 
नेपालमा पर्यटनको ठूलो सम्भावना छ । सरकारले पनि पर्यटक बढाउन विभिन्न कार्यक्रमहरु अघि बढाईरहेको छ । त्यसका लागि सरकार, निजी क्षेत्र सहकार्य आवश्यक छ । जसको कारण पर्यटकको संख्या बढाउन सकिन्छ । सोहीअनुसार सन् २०२० सम्ममा २० लाख पर्यटक भित्र्याउने लक्ष्यअनुसार मन्त्रालयले पनि काम गरिरहेको छ । पर्यटकीय पूर्वाधार निर्माण लगायतका अन्य कामहरु पनि अघि बढेको छ । तर, पर्यटनमा केही विकृतिहरु पनि छन् । त्यो कुरा अहिले परेको उजुरीले पनि संकेत गर्छ । के हो भनेर हामी छानविन गर्दैछौं । हाम्रो नियत कसैलाई त्रसित बनाउने होइन । पर्यटनमा भएका विकृति हटाउने हो । व्यवसायको नाममा गलत गर्नेलाई छाड्दैनौं । इमान्दारीपूर्वक काम गर्ने व्यवसायीलाई थप प्रोत्साहन गर्छौं । 

तपाईंको बिचार