Wednesday, August 23, 2017

नाफाघाटाको हिसाब गरेर जेटीसीसीबाट भाग्नुहुँदैन : दाहाल

प्रकाशित मिति: 2015/08/19
चन्द्र दाहाल, संयोजक –संयक्त पर्यटन समन्वय समिति (जेटीसीसी)
चन्द्र दाहाल, संयोजक –संयक्त पर्यटन समन्वय समिति (जेटीसीसी)

संयुक्त पर्यटन समन्वय समिति (जेटीसीसी)लाई अहिले नेपाल एसोसिएसन अफ र्‍याफ्टिङ एजेन्ट्स (नारा)का अध्यक्ष चन्द्र दाहालले हाँकिरहनुभएको छ । कुनैबेला सबैलाई एक ढिक्का बनाउने सपना बोकेर स्थापित जेटीसीसीको विषयलाई लिएर पछिल्लो पटक वादविवाद देखिएको छ । कतिपयले यसको औचित्यमाथि नै प्रश्न उठाउँदै संगठनबाट बाहिरिएको घोषणा गरेका छन् । यस्तो गम्भीर परिस्थितिमा जेटीसीसी हाँक्ने जिम्मेवारी पाएका दाहालले अब जेटीसीसीलाई कसरी अगाडि बढाउलान् भन्ने कुरा अहिले सबैको चासो र चिन्ताको विषय बनेको छ । यसैको सेरोफेरोमा रहेर संयोजक दाहालसँग गन्तव्य नेपालले गरेको अन्तरंग संवादः

जेटीसीसीको औचित्य नै सकियो भनेर विवाद भइरहेको बेला नेतृत्व सम्हाल्न आइपुग्नुभयो, के छ तपाईको धारणा ?  
    पक्कै पनि सुरुवाती समयमा जुन रुपमा हामी एकजुट थियौँ अहिले हाम्रा केही साथीहरुबीच मनमुटावको स्थिति सृजना भएकै हो । त्यही कारण केही साथीहरुले यहाँ नबस्ने घोषणा समेत गर्नुभएको छ । तर कसैले विमति जनाएर जाँदैमा जेटीसीसी समाप्त हुँदैन । २०१४ मार्च २३ का दिन हामी केही व्यवसायीहरु बसेर पर्यटन क्षेत्रका सबै व्यवसायी एकजुट हुने कुनै संगठन गठन गर्ने योजना बनायौँ । जुन अनुरुप नै हामीले यसको गठन गरेका हौँ । गठन भएसँगै नेपाल पर्यटन बोर्डमा व्यापक अनियमितताको कुरा आयो, जुन जालो च्यात्न हामी केही व्यवसायीले मात्र सम्भव नहुने देख्यौँ र सबैलाई समेटेर जाने निर्णयअनुसार यसको आकार ठूलो भयो । त्यसका लागि अलि नेतृत्व अलि बलियो संगठनलाई दिनुपर्छ भन्ने सोचअनुसार टानलाई नेतृत्वको जिम्मेवारी लिने सहमति भयो  । त्यसपछि नाट्टा र अहिले हाम्रो जिम्मामा आएको हो । पक्कै पनि केही साथी विमति राख्दै बाहिरिनु भएको हो तर कसैले छाडेर जाँदैमा जेटीसीसीको औचित्य सकियो भन्नु हल्ला मात्र हो । 

संयोजकको जिम्मेवारी पाएसँगै जेटीसीसीलाई कसरी अगाडि लैजाने सोचमा हुनुहुन्छ ? 
    मैले जिम्मेवारी पाएको केही हप्ता मात्र भएको छ । अहिले म कसरी अगाडि बढाउने विषयलाई नै लिएर गृहकार्यमा लागिरहेको छु । पर्यटन मन्त्रालय, पर्यटन विभाग, नेपाल पर्यटन बोर्ड र पर्यटकीय संघसंस्थासँग हामी सहकार्य गरिरहेका छौँ । असन्तुष्ट पक्षलाई पनि पुनः पुरानै घरमा फर्काउनु मेरो पहिलो प्राथमिकता हो । जसका लागि म छिटै छलफल अगाडि बढाउँछु । यसका साथै सम्बन्धित निकायमा  दर्ता गराई पर्यटन क्षेत्रको छुटै ब्रान्डको रुपमा यसलाई चिनाउन महासंघको रुप दिनु मेरो पहिलो प्राथमिकताको विषय हुनेछ । 

थप सशक्त हुँदै जानुपर्ने संगठनबाट व्यवसायीले अहिले किन हात निकाल्दै  गएको ? 
    मैले अघि नै भने यसको प्रमुख कारण हामी भित्रको विमति नै हो । त्यसैले त हामी पुनः छलफलमा जुटेका छौँ । पर्यटन क्षेत्रमा अब अरु जेटीसीसी जन्मँदैन, त्यसकारण फेरि पनि यसलाई बलियो बनाउनुपर्छ । जसका लागि हामी व्यवसायी पुनः एक हुनुको विकल्प छैन् । जसका लागि गल्ती सच्याउन सबै तत्पर हुनुपर्छ । अहिले उहाँहरु व्यावसायिक बाध्यताले यहाँबाट केही समयका लागि हिँड्नु भएको हो । अब फेरि आउनुहुन्छ  र यो बलियो नै भएर उभिन्छ । 

जेटीसीसीको औचित्य नै सकियो भन्नेहरुलाई तपाई के भन्नुहुन्छ ?
    भन्ने स्वतन्त्रता सबैलाई छ । सकिएको नसकिएको कुरा त सबैमाझ स्पष्ट छ । हामीले गरेका क्रियाकलाप, आगामी योजनाले पनि प्रष्ट पार्छ । निजी क्षेत्र रहुन्जेल जेटीसीसी रहन्छ । यो कुनै व्यवसायीको मात्र होइन सबैको साझा संगठन हो । यो व्यवसायीकै आवाज बुलन्द पार्ने फोरम हो । 
अहिले व्यक्तिगत रुपमा नाफाघाटाको हिसाबकिताब गरेर यसलाई विवादित पार्ने र फुटाउने प्रयास कसैबाट हुनुहुँदैन । त्यसकारण गल्ती सच्याउँदै हामी एक हुनुको विकल्प छैन । जोजो बाहिरिनु भएको छ, उहाँहरुलाई पनि सल्लाह छ फेरि एउटै डुङ्गामा बसेर पर्यटन क्षेत्रको विकासका लागि सहयात्रामा लागौँ । 

भूकम्पपछिको पर्यटन विकास र प्रवद्र्धनमा तपाइहरुको भूमिका कस्तो रहन्छ ?
    भूकम्पपछि सबैभन्दा चपेटामा परेको कुनै व्यवसाय छ भने त्यो पर्यटन नै हो । हाम्रा अधिकांश सम्पदाहरु सग्लै रहे पनि अन्तर्राष्ट्रिय स्तरमा भएका अनावश्यक प्रचारले अझै पनि सोचेअनुसारको पर्यटन आगमन हुनसकेको छैन । त्यसकारण हामीले तत्काल प्रचार प्रसारका कार्यलाई तीव्र बनाउँदै हाम्रा सम्पदा पुनर्निर्माणमा पनि लाग्नुपर्छ । 
    जसका लागि हामी छलफलमा छौँ । केही समय भित्रै पर्यटन मन्त्रालय र बोर्डसँगको सहकार्यमा अगाडि बढ्छौँ । त्यसकारण म पुनः दोहोर्‍याउँछु भूकम्पपछि पर्यटन क्षेत्रलाई विगतै अवस्थामा फर्काउन पनि हामीले विशेष पहल चाल्नु आवश्यक छ, त्यसकारण जेटीसीसी पुनः जाग्नुपर्ने बेला आएको छ । 

तपाईंको बिचार