Thursday, May 23, 2019

धुलिखेल–खुर्कोट सडकलाई दुई लेनमा विस्तार गर्न बजेट माग

प्रकाशित मिति: 2019/05/03

२० वैशाख, काठमाडौं । सडक विभागले वीपी राजमार्गअन्तर्गतको धुलिखेल–खुर्कोट सडकलाई दुई लेनमा विस्तार गर्ने योजना अघि सारेको छ । आगामी वर्षको बजेटबाट नै यो खण्ड विस्तारका लागि रकम व्यवस्था गर्न विभागले सरकारसँग माग गरेको छ ।

यो प्रस्तावमा अर्थ मन्त्रालयले सकारात्मक जवाफ दिएको विभागका एक उच्च अधिकारीले बताए । ती अधिकारीका अनुसार यो खण्डमा सडक विस्तार गर्न स्थानीय समुदायले दबाव दिएका छन् ।
यो खण्डमा ठूला सवारी चलाउन रामेछाप क्षेत्रका स्थानीयले लामो समयदेखि माग गर्दै आएका छन् । तर, सरकारले ३२ सिटसम्मको यात्रुबाहक र १० टनसम्मको मालबाहक सवारी मात्रै चलाउन सकिने गरी अनुमति दिएको छ ।

निकै चर्चित र सुन्दर वीपी राजमार्ग जापान सरकारले बनाइदिएको हो । तर एक लेनमा मात्र बनाइएको हुँदा ठूला सवारीलाई यो सडक प्रयोग गर्नु जोखिमपूर्ण हुन्छ । त्यसैले सरकारले सजिलै विस्तार हुन सक्ने खुर्कोटसम्मको खण्डलाई फराकिलो बनाउन आगामी वर्षबाटै प्रक्रिया थालिन लागेको हो ।
हाल यो सडकमा पूर्वबाट आउने र पूर्वी पहाडी जिल्लामा जाने साना सवारीको बाहुल्य हुन्छ । रातको समयमा भने यो सडकमा ठूला सवारी चलाउन निषेध छ ।
खुर्कोट–सिन्धुलीमाडी खण्ड भने विस्तार गर्न अप्ठेरो रहेको निश्कर्ष विभागको छ । त्यसैले त्यो खण्डमा सुरुङमार्ग बनाउन अध्ययन सुरु भएको छ । हाल विभागले सुरुङमार्ग बनाउन सकिन्छ÷सकिँदैन, कति दूरीको बनाउन सकिन्छ र कति खर्च लाग्न सक्छ भन्ने विषयमा प्रारम्भिक अध्ययन गरिरहेको छ ।
यो खण्डमा पनि दुई लेनको सुरुङमार्ग बनाउने योजना छ । बर्दिबासबाट सिन्धुलीमाडीसम्म भने दुई लेनस्तरकै सडक छ ।
वीपी राजमार्गको पुनर्निर्माणका लागि जापानले १ अर्ब ८ करोड रुपैयाँ अनुदान सहयोग गर्ने सम्झौता भइसकेको छ ।

वीपी राजमार्ग भूकम्प र ओभरलोडेड सवारीका कारण विभिन्न भागमा बिग्रिएको छ । केही भागमा पहिरो खसेर समस्या छ । अब मर्मत पनि जापानले नै सहयोग गरिदिन लागेको छ । १६० किलोमिटरको यो राजमार्गका झण्डै २ दर्जन स्थानमा पुनर्निर्माण आवश्यक देखिएको छ । राजमार्गको संरक्षणमा सरकार चुक्दा वीपी राजमार्गको अवस्था दिनप्रतिदिन जीर्ण बन्दै गएको छ ।
विभिन्न कज–वेहरुमा पुल बनाउने गरी सडक विभागसाग सम्झौता पनि भएको छ । अब वीपी राजमार्गमा बन्ने पुल दुई लेनकै हुनेछ ।

तपाईंको बिचार