Tuesday, February 19, 2019

ठूला राजनीतिक दलका नेताहरु नमिलेसम्म ठूलो भ्रष्टाचार हुँदैनः पूर्वप्रधानमन्त्री भट्टराई

प्रकाशित मिति: 2019/01/16

काठमाडौं । पूर्वप्रधानमन्त्री डा. बावुराम भट्टराईले वाइडबडी विमान खरिद प्रकरणमा भ्रष्टाचार भएकोमा दुइमत नरहेकोे दाबी छ ।

नयाँ शक्ति पार्टीको संसदीय मामिला एवम् राज्य व्यवस्था विभाग र नेपाल पर्यटन परिषदद्वरा बुधबार आयोजित अन्तरक्रिया कार्यक्रममा भ्रष्टाचार छानबिन गर्न अधिकार सम्पन्न सर्वदलीय संसदीय समिति गठनको समेत माग गरेका छन् ।

संसदीय समितिहरुले बनाएको उपसमितिको प्रतिवेदनका आधारमा दोषिलाई कारबाही हुन नसक्ने समेत उनले बताएका छन् । ‘अहिले संसदको सार्वजनिक लेखा समिति अन्तर्गतको उपसमितिले छानविन गरेर प्रतिवेदन बुझाएको छ भने संसदकै अन्तर्राष्ट्रिय सम्बन्ध समितिको उपसमितिले पनि छानबिन गरिरहेको छ’ उनले भने, ‘उपसमितिहरुले सिमित दायराभित्र रहेर मात्रै छानविन गर्ने भएकाले सर्वदलीय अधिकार सम्पन्न समिति बनाएर छानविन गर्न माग गर्दछु ।’

सरकारले बनाएको न्यायिक आयोगले पनि सत्यतथ्य बाहिर ल्याउन नसक्ने उनको दाबी छ । संसदीय समितिहरुले उपसमिति गठन गरेर छानविन गरिरहेका बेला सरकारले न्यायिक आयोग बनाउनुको कुनै अर्थ नहुने उनले बताए ।

ठूला राजनीतिक दलका ठूला नेताहरु नमिलेसम्म ठूलो भ्रष्टाचार हुन नसक्ने भन्दै उनले जोगाउन नेताहरुले राष्ट्रिय सहमति गरेको हुनसक्ने उनले बताए । ‘केहि समयअघि प्रधानमन्त्री लगायत ठूला दलका नेताहरु बसेर केहि सहमति गरेको भन्ने सुनेको थिए । मेरा पुराना मित्र प्रचण्डलाई म राम्ररी चिन्छु । उनी फुर्के मान्छे, चितवन पुगेर केहि विषयमा राष्ट्रिय सहमति गरेका छौं भन्नुभयो’ उनले भने, के विषयमा राष्ट्रिय सहमति भएको हो भन्ने लागिरहेको थियो । वाइडबडीकै विषयमा राष्ट्रिय सहमति भएको रहेछ ।’

आफू अर्थमन्त्री र हिसिला यमी पर्यटनमन्त्री भएकै बेला मुलुकको पर्यटन प्रवद्र्धनका लागि दुई वटा ठूला नयाँ जहाज किन्ने निर्णय भएको स्मरण गर्दै उनले पुराना जहाज किन्नुले नै भ्रष्टाचार भएकै छ भन्ने प्रष्ट भएको उनले बताए ।

कार्यक्रममा अर्थविज्ञ अच्युत वाग्लेले सार्वजनिक लेखा समिति अन्तर्गतको उपसमितिले बनाएको प्रतिवेदनमा त्रुटी भएको बताए । ‘भ्रष्टाचार नभएको भन्ने ठाउँ छैन, भ्रष्टाचार भएकै छ । तर लेखा समितिको रिपोर्टका कारण मन्त्रीलाई पत्रकार सम्मेलन गर्ने हिम्मत आएको छ’ उनले भने, ‘एक लाख चोरेको चोरलाई चारलाख चो¥यो भन्यो भने त उसले मरिगए हो भन्दैन । यहाँ पनि त्यस्तै भएको छ ।’

उनले अख्तियारमा भ्रष्ट तथा सबैले छिछि दुरदुर गरेका व्यक्तिहरुलाई पालैपालो प्रमुख बनाइएको आरोप समेत लगाए । भ्रष्टलाई अख्तियार प्रमुख बनाइएका कारण काम देखाउन १५ सय घुस खाने कर्मचारीलाई कारबाही गरिएको उनले बताए ।

ठूला भ्रष्टाचारका विषयमा भने अख्तियारले अनुसन्धान तथा कारबाही गर्न नसक्ने उनको दाबी छ । अख्तियारले वाइडबडीमा पनि कुनै निश्कर्ष निस्कन नसक्ने भन्दै वाग्लेले भने, ‘म हस्ताक्षर गरेर दिन्छु, यसको कुनै निकाश निस्कदैन ।’

संघीय समाजवादी फोरम नेपालका सांसद प्रदीप यादवले भ्रष्टाचार लुकाउन ठूला प्रयास भइरहेको बताए । लेखा समितिले वाइडबडीका विषयमा छानविन गर्न बनाएको उपसमितिका सदस्यसमेत रहेका सांसद यादवले दोषिलाई जोगाउन प्रतिवेदन सच्याउने समेतका कामहरु भएको आरोप लगाए ।


 

 

 

 

 

 

 

 

 

 

 

 

 

तपाईंको बिचार