Monday, December 11, 2017

मनास्लु–ल्होत्से हिरक महोत्सव सुरु,आरोहीहरुलाई सम्मान

प्रकाशित मिति: 2016/04/30

 वैशाख १८,काठमाडौं ।  मनास्लु–ल्होत्से हिमालको प्रथम आरोहणको ६० वर्ष पूरा गरेको उपलक्ष्यमा शनिबार राजधानीमा हीरक महेत्सवको उद्घाटन गरिएको छ । हीरक महोत्सवलाई सम्बोधन गर्दै राष्ट्रपति भण्डारीले भौगोलिक विशिष्टता र अनुपम पहिचान बोकेको हिमालय पर्वत आफैँमा विश्वको ज्यादै ठूलो महत्वपूर्ण धरोहर भएको उल्लेख गरिन्।

राष्ट्रपति भण्डारीले नेपालको भौगोलिक विशिष्टता हिमालय शृङ्खला पर्यावरणका दृष्टिले एकदम संवेदनशील क्षेत्र हो भन्दै हीरक समारोहमा पर्वतीय पर्यटनका चुनौती र अवसरबारे गरिने सम्मेलनले जलवायु परिवर्तनको असर र यसको जोखिम नियन्त्रणका लागि विज्ञबाट आउने सुझाव महत्वपूर्ण हुने बताइन्।

उनले विगतका विभिन्न प्राकृतिक प्रकोपमा पनि पर्वतारोहण गरी अदम्य साहसका प्रतीकका रुपमा आफ्नो बहुमूल्य जीवन उत्सर्ग गर्नुहुने स्वदेशी तथा विदेशी पर्वतारोही, अध्ययनकर्ता र पदप्रदर्शकप्रति हार्दिक श्रद्धाञ्जलि व्यक्त गर्दै मृतकका परिवारप्रति समवेदना प्रकट गरिन्।
सूचना तथा सञ्चारमन्त्री शेरधन राईले नेपालको हिमाल र पदयात्रा साहसिक पर्यटनका लागि विश्व पर्यटनको आकर्षण रहेको उल्लेख गर्दै प्रवद्र्धन विकासका लागि सरकारले विशेष महत्व दिएको बताए।

संस्कृति पर्यटन तथा नागरिक उड्डयन मन्त्रालयका सचिव प्रेमकुमार राईले साहसिक पर्यटनका लागि विश्वकै आकर्षण रहेको नेपालको पर्वतीय पर्यटन प्रवद्र्धन र जलवायु परिवर्तनबाट हुन सक्ने जोखिम नियन्त्रणका लागि सम्मेलन फलदायी हुने विश्वास व्यक्त गरे।

नेपाल पर्वतरोहण सङ्घका अध्यक्ष आङछिरिङ शेर्पाले महोत्सवले नेपालको पर्यटन प्रवद्र्धन र पुनरोत्थान तथा नेपाल पर्यटनका लागि सुरक्षित गन्तव्य रहेको सकारात्मक सन्देश प्रवाह गर्न सहयोग पुग्ने धारणा राखे।

नेपालका लागि जापानिज राजदूत मासासी ओगावाले दुई देशबीचको मैत्रीपूर्ण सम्बन्धलाई थप प्रगाढ बनाउन हीरक महोत्सव फलदायी हुने बताए। प्रथम आरोही मिनोरू हिगेटाले ६० वर्षअघि मनमोहक हिमालको सफल आरोहणले नेपालप्रतिको मोहलाई बढाएको बताए।

संस्कृति, पर्यटन तथा नागरिक उड्डयन मन्त्रालय र नेपाल पर्वतारोहण सङ्घले संयुक्त रुपमा आयोजना गरेको महोत्सवमा मनास्लु हिमालका प्रथम आरोही हिगेटा, सर्वोच्च शिखर सगरमाथा आरोहण गर्ने प्रथम जापानिज आरोही जुनको ताबेई लगायत स्वदेशी तथा विदेशी पर्वतारोही तथा नेपाल सरकारका उच्च पदस्थ अधिकारीको सहभागिता थियो ।

सो अवसरमा केटु हिमाल चढ्ने प्रथम नेपाली महिला पासाङ ल्हामु शेर्पा, हिमालयन ट्रस्ट संस्था तथा मनास्लु प्रथम आरोही हिगेटा, जुनको तावेइलगायत विभिन्न आरोहीलाई कदरपत्रद्वारा सम्मान गरिएको थियो । राष्ट्रपति भण्डारीले आरोहीलाई सम्मान प्रदान गरेकी थिइन्।

तपाईंको बिचार