Friday, October 20, 2017

कालीगण्डकीमा रहेका विश्वकै ठूलो शालिग्राम डुबानमा

प्रकाशित मिति: 2016/07/03

असार १९, पर्वत । बिहीबारदेखि परेको लगातारको वर्षाका कारण विश्वकै ठूलो शालिग्राम शिला डुबानमा परेको छ । पर्वत, स्याङ्जा र गुल्मीको सिमानामा पर्ने  शालिग्राम गाविसमा रहेको विश्वकै ठूलो शालिग्राम कालीगण्डकीमा पानीको सतह बढेपछि डुबानमा परेको हो  ।  
शिला डुबानमा परेसँगै उक्त क्षेत्रमा कार्यरत पुजारी तथा पण्डित समेत विस्थापित छन् । पवित्र शालिग्राम शिला र शालिग्राम क्षेत्रका सत्तल लगायत संरचना ड्बानमा परेको स्थानीय प्रहरीचौकीका प्रहरी सहायक निरीक्षक चन्द्रकान्त न्यौपानेले जानकारी दिनुभयो । शिला संरक्षणका लागि बनाइएको तटबन्ध र ग्याबिनसमेत पानीले पुरिएपछि शिलामा दर्शन गर्न जाने पूर्वाधार पनि पूर्ण रुपमा क्षति पुगेको उहाँले बताउनुभयो । 

यता पानीको बहाब ह्वात्तै बढेपछि स्थानीयवासी रातभर जाग्राम बसेका छन् । कतिबेला घरसम्मै आएर डुबाउने हो भन्ने चिन्ताले रातभर जाग्राम बस्नुपरेको स्थानीय शिक्षक अशोकसिंह पाण्डेले जानकारी दिनुभयो । मुलुककै सबैभन्दा ठूलो कालीगण्डएकी ‘ए’ जलविद्युत् आयोजनाको बाँधका कारण बाढी आउँदा पर्वत, स्याङ्जा र गुल्मी जिल्लाको सिमानामा पर्ने सेतीवेणी बजार डुबानको खतरामा पर्ने गरेको हो । सेतीवेणी बजार डुबानको खतरा बढेपछि पर्वतमा पर्ने बजार क्षेत्र र स्याङ्जाको पिँढीखोलामा पर्ने बजार क्षेत्रमा झन्डै डेढ सय व्यापारी तथा सर्वसाधारण त्रसित छन् । 

छ वर्षअघि कालीगण्डकी र सेतीखोलो उर्लेर आउँदा तीन दर्जन घरपरिवार विस्थापित थिए । बिहीबारदेखिको वर्षा र बाढीले स्याङ्जातर्फका भागमा कटान सुरु गरिएकाले बाढीको मात्रा बढेमा जुनसुकै बेला पनि बाढी पसेर बजार बगाउन सक्ने देखिएको छ । विसं २०६६ असोज २१ मा बजार क्षेत्र नै डुबानमा परेको घटनाले उनीहरुमा सधैँभर त्रास थप्ने गरेको स्थानीय शिक्षक पाण्डेले बताउनुभयो । 

कालीगण्डकीमा पानीको सतह बढेपछि कालीगण्डकी ‘ए’को बाँधका सबै ढोका खोल्न लगाइएको प्रजिअ शम्भुप्रसाद मरासिनीले जानकारी दिनुभयो । उहाँले विश्वकै ठूलो शालिग्राम शिला डुबेको तर बजारसम्म भने आइनसकेको जानकारी दिनुभयो । उहाँले स्थानीय प्रहरी चौकीलाई निगरानी बढाउन लगाइएको तथा पानीको सतह बढेर माथि आउनेबित्तिकै स्थानीयवासीलाई सुरक्षित स्थानमा लैजान निर्देशन गरिएको जानकारी दिनुभयो । वर्षा नरोकिएमा जुनसुकै बेला पनि खतरा बढ्ने भएकाले स्थानीयवासीलाई सचेत भएर बस्न आग्रह गरिएको छ ।

 
 

तपाईंको बिचार