Friday, May 24, 2019

सर्वसाधारणले हवाई टिकट नपाउँदा अलपत्र

प्रकाशित मिति: 2018/10/18

बाँके । दसैँको बेला नेपालगञ्ज विमानस्थलमा यात्रुको चाप अत्यधिक रूपले बढेको छ। यात्रुको चापको तुलनामा जहाजको उडान न्यून रहेको छ।

जहाज कम्पनीले टिकट वितरण गर्दा पहुँचवालालाई मात्र प्राथमिकता दिने गरेको यात्रुको गुनासो छ। कर्णाली प्रदेशको डोल्पा र हुम्लामा सडक यातायातको पहुँच छैन। कर्णालीका जुम्ला, मुगु तथा सुदूरपश्चिम प्रदेशको बाजुरामा सडक यातायात पुगे पनि त्यति भरपर्दो नरहेकाले सो क्षेत्रका बासिन्दाले आवतजावतका लागि हवाई यातायातको साहारा लिनुपर्ने बाध्यता छ।

टिकट नपाउँदा पहाडी जिल्लाका यात्रु चाडपर्वको समयमा सधैँ मर्कामा पर्ने गर्छन्। टिकट वितरणको काम व्यवस्थित नहुँदा हरेक वर्षको दसैँ तिहारमा पहाडी तथा हिमाली जिल्लाका यात्रुले सास्ती खेप्नुपरेको छ।
हवाई टिकटमा ठूलाबडाको भनसुन चल्ने गरेपछि सामान्य सर्वसाधारणको बिचल्ली नै भएको छ।

मुगुका सुरेन्द्र शाहीले भने, ‘टिकट जति सबै मन्त्री र सांसदको पावरमा बाँडिएको छ, सर्वसाधारणलाई चाहिँ बिचल्ली पार्ने काम भएको छ।’

नेपालगञ्ज विमानस्थल कार्यालयका प्रमुख प्रेमनाथ ठाकुरले जहाजको उडान भन्दा यात्रुको चाप धेरै भएको बताए। उनका अनुसार पहाडी जिल्ला डोल्पा, मुगु, हुम्ला, जुम्ला र बाजुराका लागि तारा र समिट एयरले दैनिक रूपमा एकरएक उडान भर्दै आएका छन्।

‘सीता एयरको जहाज अहिले बिग्रेको छ, नेपाल एयरको जहाजले आइतबारदेखि मात्रै उडान सुरू गरेको छ’, उनले भने, ‘तारा र समिट एयरसँग एकरएक मात्रै जहाज चालू अवस्थामा छन्, यी दुई जहाजले दैनिक रूपमा उडान भर्छन्।’

तपाईंको बिचार