Thursday, January 21, 2021

मन्त्रीपरिषद्बाट कसैलाई पनि हटाउँदिन : मुख्यमन्त्री गुरुङ

प्रकाशित मिति: 2020/12/30

१५ पुस, काठमाडौं । गण्डकी प्रदेशका मुख्यमन्त्री पृथ्वीसुब्बा गुरुङले प्रचण्ड माधव समूहका मन्त्रीहरुलाई नहटाउने बताएका छन् ।

सत्तारुढ नेपाल कम्युनिस्ट पार्टी (नेकपा)मा फुट आएसँगै प्रदेश सरकारहरु मुख्यमन्त्रीविरुद्ध अविश्वासको प्रस्ताव ल्याउने र मन्त्रीहरु हटाउने होड देखिएको छ । तर गण्डकीमा प्रचण्ड माधव समूहले अविश्वासको प्रस्ताव ल्याएको छैन भने ओली समूहमा रहेका मुख्यमन्त्री गुरुङले अर्को समूहका मन्त्रीहरुलाई हटाएका पनि छैनन् । अहिले हटाउने योजना नरहेको उनले बताए । ‘मलाई एकता नचाहिने भए उतातिरका मन्त्रीहरुलाई हटाइदिन सक्थेँ हटाएको छैन नि,’ नेपाल लिटरेचर फेस्टिभलको ‘प्रदेशबाट देखिएको देश’ सत्रमा मुख्यमन्त्री गुरुङले भने, ‘उहाँहरुले आफैं राजीनामा दिए मेरो केही लाग्दैन तर मैले उहाँहरुलाई हटाउँदिन ।’

मुख्यमन्त्री गुरुङले संसद विघटनको बचाउ गरे । संसद भंग गरेर प्रधानमन्त्रीले अप्रजातान्त्रिक काम गरेको भन्नु गलत भएको उनको दाबी छ । ‘पार्टीको विवादले काम गर्न पाइनँ, अनुशासनहीन मान्छेले कामै गर्न दिएनन् । यिनीहरु ठीक कि म ठीक तपाईंहरुले नै छुट्याइदिनुस् भनेर प्रधानमन्त्री जनतामा जानुभएको हो,’ मुख्यमन्त्रीले भने, ‘वैशाखमा चुनाव हुन्छ ।’

उनले नेपालमा देशभक्त नेतालाई खुइल्याउन र अस्थिरता फैलाउने प्रयास भइरहेको बताए । मदन भण्डरीको अवसानपछि नेतृत्वमा माधवकुमार नेपाल देखिए पनि विचारको नेतृत्व केपी शर्मा ओलीले गरेको दाबी गरे ।  

तपाईंको बिचार