Wednesday, December 1, 2021

लुम्बिनीमा संविधान दिवस : प्रमुख विपक्षी एमालेलाई निम्तो नै दिइएन

प्रकाशित मिति: 2021/09/19

३ असोज, बुटवल । लुम्बिनी प्रदेश सरकारले संविधान दिवसको अवसरमा गरेको विशेष समारोहमा नेकपा एमाले उपस्थित भएन । मुख्यमन्त्री तथा मन्त्रिपरिषद्को कार्यालय प्रांगणमा गरिएको संविधान दिवस मूल समारोहमा प्रमुख विपक्षी एमालेलाई औपचारिक निम्तो नै नगरिएका कारण अनुपस्थित भएको हो । यस्तै सत्तारुढ गठबन्धनमा आवद्ध जनता समाजवादी पार्टीका तीनै जना मन्त्रीहरु पनि संविधान दिवस नमनाउने पार्टीको नीति अनुसार अनुपस्थित भए ।  मूल समारोहमा मुस्किलले एक सय जना हाराहारीको मात्रै सहभागिता देखिन्थ्यो । समारोहमा स्थानीय तहका जनप्रतिनिधि र सरकारी कर्मचारीको उपस्थिति पनि निकै न्यून थियो । प्रमुख विपक्षी दल एमालेका सांसद एवं पूर्वमन्त्री वैजनाथ चौधरीले आफ्नो दललाई खबर नै नभएको बताए । ‘संविधान दिवस जस्तो साझा कार्यक्रममा प्रमुख विपक्षी दललाई खबरै छैन, कुनै म्यासेज नै छैन,’ चौधरीले भने, ‘बरु प्रदेश प्रमुखले ४ गते दिवा भोजमा बोलाउनुभएको छ, त्यहाँ हाम्रो दलबाट साथीहरु जानुहुन्छ ।’

जनता समाजवादी पार्टी संसदीय दलका नेता एवं भौतिक पूर्वाधार विकास मन्त्री सहषराम यादवले वर्तमान संविधान पूर्ण नभएको र महिला, मधेशी, आदिवासी जनजाति र दलितको अधिकार स्थापित नभएकाले संविधान दिवस नमनाउने निर्णय गरिएको बताए । संविधान दिवस मूल समारोह आयोजनाको समन्वय गरेको आन्तरिक मामिला तथा सञ्चार मन्त्रालयका सचिव रविलाल पन्थले सबै माननीयलाई निमन्त्रणा गर्ने जिम्मा प्रदेशसभा सचिवालयको भएकाले त्यहाँ जानकारी गराएको प्रतिक्रिया दिए । प्रदेशसभा सचिवालयका सचिव दुर्लभकुमार पुनले भने सभामुख र आफूलाई  निमन्त्रणा आए पनि माननीयहरुलाई निमन्त्रणाको विषयमा जानकारी नभएको बताए । ‘मन्त्रालयले आफैं निमन्त्रणा गरे होला भन्ने हामीलाई लाग्यो,’ पुनले भने, ‘पत्र नै आएको भए हामीले पिजन होलमा राखिदिन्थ्यौं ।’

एमाले नेतृत्वको सरकार हुदा विभिन्न रचनात्मक कार्यक्रमसहित सिंगो प्रदेशको प्रतिनिधित्व गराई भव्य रुपमा मनाइने गरिए पनि यो सरकारले संविधान दिवस समेत गतिलो ढंगले मनाउन चुकेको एमाले प्रमुख सचेतक भूमिश्वर ढकालले बताए । संसदीय मामिला पत्रकार समाज लुम्बिनीका महासचिव सीपी खनालले सरकारको नेतृत्व गरेको माओवादी केन्द्र, मुख्यमन्त्री स्वयं र मुख्यमन्त्रीको सचिवालयको कार्य सम्पादन फितलो हुँदा संविधान दिवस खल्लो हुन पुगेको टिप्पणी गरे । मुख्यमन्त्री कुलप्रसाद केसीले संविधानको पूर्ण पालना, संरक्षण र सम्वद्र्धन अनिवार्य शर्त भएको बताएका छन् । संविधान दिवस मूल समारोहलाई सम्बोधन गर्दै उनले संविधान कार्यान्वयनमा चुनौती देखिएको स्वीकार्दै पूर्ण पालनामा जोड दिए । संविधान गतिशील दस्तावेज भएकोले संविधानभित्रै रहेर यसलाई अझै समृद्धि बनाउँदै लैजान सकिने मुख्यमन्त्री केसीको भनाइ छ ।

तपाईंको बिचार